د مې لومړۍ نېټې، د کارګرانو د نړیوالې ورځې په مناسبت د مبارکۍ پیغام

Published: 2026-10-08

درنو ملګرو، د افغانستان او نړۍ کارګرانو او زحمتکښو!

د مې لومړۍ نېټه، د کارګرې طبقې د نړیوال پیوستون ورځ، د استثمار، بې‌عدالتۍ او نابرابرۍ پر وړاندې د کارګرانو او زحمتکښو د تاریخي او نه ستړې کېدونکې مبارزې څرګند سمبول دی. په دې مهمه ورځ، موږ د هغو ټولو کارګرانو درناوی کوو چې په خپلو تڼاکو ډکو لاسونو، زحمت او ټینګې ارادې سره د ټولنې د پرمختګ او هوساینې په رامنځته کولو کې مهم رول لري.

د «د افغانستان د خلق د دیموکراتیک ګوند د نوو بیرغ‌والو» د رهبرۍ کمېټه، دا ویاړلې ورځ ټولو کارګرانو، بزګرانو، مترقي روڼ‌اندو او د عدالت غوښتنې ټولو ځواکونو ته په درناوي مبارکي وایي او نېکې هیلې وړاندې کوي. د مې لومړۍ نېټه د یووالي، ټولنیز او طبقاتي پوهاوي، او هغې ګډې ارادې څرګندونه ده چې د ظلم، استثمار او هر ډول نابرابرۍ پر ځای د عدالت، برابرۍ او انساني کرامت پر بنسټ د یوې عادلانه ټولنې د جوړولو لپاره مبارزه کوي.

نن، په داسې شرایطو کې چې د افغانستان او نړۍ کارګران او زحمتکشان له مخ پر زیاتېدونکو اقتصادي، ټولنیزو او سیاسي ننګونو سره مخ دي، د پیوستون، منظمې همکارۍ او آګاهانه مبارزې اړتیا تر بل هر وخت ډېره احساسېږي. موږ باور لرو چې تلپاتې آزادي، ټولنیز عدالت او رښتینې رهایي د کارګرانو او ټولو زحمتکښو د یووالي، ګډو هڅو او پرله‌پسې مبارزې له لارې ترلاسه کېدای شي.

راځئ چې په دې تاریخي ورځ ژمنه وکړو چې د ټولنیز عدالت، برابرۍ او انساني کرامت لپاره به خپله مبارزه په لا ټینګې ارادې او مسوولانه دریځ سره روانه ساتو، د کارګرانو او زحمتکښو ترمنځ به پیوستون پیاوړی کوو، او د کارګري لوړو آرمانونو بیرغ به تل رپاند ساتو.

د کارګرانو نړیوال پیوستون دې ژوندی وي!

پرولتاري انترناسیونالیزم دې ژوندی وي!

د نړۍ کارګرانو! د استثمار، بې‌عدالتۍ او امپریالیزم پر وړاندې متحد شئ!

په درناوي

اصلان امیري
د رهبرۍ کمېټې لومړی منشي
د افغانستان د خلق د دیموکراتیک ګوند نوی  بیرغ‌وال